FAQs Sessualité

I aspeti, zënza orëi. Ći dessi pa fà?

Na gravidanza nia orüda é na gran sfidada. Fora de nia se fêjon n gröm de domandes: Co pol pa ester? Él veramënter poscibl? Ćiodì m'él pa sozedü chësc? Ći dessi pa fà? Ôi ciafè le pope? Cun che poi pa baié? Co ti al diji pa a mi compagn?
Te chësta situaziun él dër important ch'an ais zacai cun che ch'an po baié. Les colaboradësses y i colaboradus de young+direct t'ascuta sö ion.
Al é debojëgn che te nen baies cun tü geniturs. Inće a d'ëi mësson ti lascè n pü' de tëmp por capì la situaziun. Al é inće important ch'an vais da na doturia/n dotur dles ëres. Ara/Al ne fej nia ma na vijita mo te pos baié cun ëra/ël de dötes les chestiuns mediches che t'interessëia y inće dl'interuziun dla gravidanza. Por tüa situaziun él zëntri de consulënza che rajona cun tè de tüa situaziun y te dà consëis sce te pënses a n'interuziun dla gravidanza.N'interuziun dla gravidanza po ma gnì fata ti pröms trëi mëisc. Sce t'as dübi sce t'os bëgn ciafè le pope él dërt che t'informëies adora assà por avëi ćiamò dlaurela da tó na dezijiun. Deache n pope ne po nia ma ester n pëis, mo inće na gran scincunda.

Co funzionëia pa l'aburt?

Tla Talia él poscibl do lege (lege n. 194 dl 1978) da interumpe na gravidanza tl tëmp de 90 dis dala fecondaziun a condiziun ch'al vëgnes fat n dialogh de consulënza pro n sorvisc che dà consulënza sön conflić dla gravidanza, p. ej i ospedai da Maran y Balsan o la Consulënza familiara.
L'interuziun po spo gnì fata debann t'ospedal. Les mitans de mëndra eté adora la firma de trami i geniturs o l'autorisaziun dl tribunal de ghiravanza.
Sc'al é rajuns pesoćes por n'informè nia i geniturs, o sce i geniturs n'ô nia dè so consëns po le sorvisc de consulënza menè inant na domanda d'interuziun dla gravidanza al tribunal de ghiravanza.
Important da savëi: Degügn ne po te sforzè da interumpe la gravidanza.

Co ciàfon pa la pilora dl dé do?

La pilora dl dé do é n meso presservatif d'emergënza. Ara impedësc l'ovulaziun y cun chësta inće na gravidanza, sce l'ovulaziun n'é nia ćiamò stada. Porchël mëssera gnì tuta ite plü debota ch'ara va, mo te vigni caje tles 72 ores do le raport sessual. Sce l'ovulaziun é bele stada y al é bele stè la fecondaziun spo ne n'àra plü degöna faziun. Deach'ara contëgn tröc ormonns pora gaujé faziuns colaterales nia da püch. Ara po gnì scrita dala doturia/dal dotur de ćiasa, dala ginecologa/dal ginecologh tl Pröm aiüt t'ospedal o dal sorvisc aprontè medich dl Raiun sozial.
Important: La pilora dl dé do é ma ponsada por n caje d'emergënza y nia adatada sciöche meso presservatif normal. Al mëss gnì ponsè a n ater meso presservatif por le mëis romagnënt.

Mi dansö é massa gran/pice

Nüsc corps é düć atramënter: sciöche nüsc edli à düć n'atra forma y n ater corù, insciö él mefo inće desfarënzies de dansö. Al po ester pice, gran, plëgn o che toma danjö. Inće les bauries dl dansö à dötes na forma desvalia, corusc y grandëzes desfarëntes. Le dansö se müda porater tratan nosta vita sciöche vigni atra pert dl corp. Te pos ion baié cun les colaboradësses y i colaboraduas de young+direct.

Co feji pa da savëi sc'i sun omossessuala/omossessual?

Ara döra dî ćina ch'an à ciafè fora cal che é nosc orientamënt sessual. Al é jënt che sa valgamia aslöm ch'ara é lesbica o buserënta, d'atra indere s'intënn pormò plan plan ch'ara se sënt atrata sessualmënter deplü da porsones dl medemo ses. Tòlete tëmp y no stè a te lascè mëte sot a presciun. Datrai pol oghé da baié cun zacai. Na conversaziun cun na colaboradëssa/n colaboradù de young+direct resta te vigni caje danter os.

Can dessi pa jì por le pröm iade dala doturia/dal dotur dles ëres?

Tan inant che te stas saurì y che le svilup de to corp corespogn mesanamënter a chël por tüa eté ne n'él degöna rajun por jì da na ginecologa/ginecologh (doturia/dotur dles ëres). Mo canche le tema dla presservaziun devënta atual por tè o sce t'as domandes de chësc vers, pol ester por val' sc'an baia cun na porsona esperta te chësc ćiamp. Sce t'as la poscibilité làscete aconsié da tüa uma o da n'atra ëra adulta por ći che reverda la lîta dla doturia/dl dotur dles ëres y en caje làscete inće acompagné ala vijita da na porsona de crëta.

Co s'intënon pa sc'an à maraties sessuales?

La maiù pert dles maraties sessuales se lascia adintëne tres beca, fićiamënt, mè o mudamënć dla pel dlungia i genitai. Te chisc caji désson belatira contatè na doturia o n dotur.
En linia de prinzip se scónon tres l'igiena personala (se lavè cun ega y se mudé le guant da sotite), la lîta dl partner sessual y l'adoranza de condoms.

É l'onania val' de burt?

Al toca pro la porsona ch'ara pratichëia inće l'onania. N valgügn le fej gonot, d'atri indere mai y ćiamò d'atri le fej ma te na fasa determinada de süa vita.
Tres l'onania impàreste a conësce miù to corp. Mo sce la vëia da pratiché l'onania é tan grana che ne t'es nia plü buna/bun da lascè y d'atri aspeć de tüa vita nen paia sura, po l'onania inće deventè na dependënza. Cun les colaboradësses y i colaboradus de young+direct poste rajonè francamënter.

Dieser Post ist auch verfügbar auf: German, Italian